Xırdalanın magistral yollara çıxışını asanlaşdırmaq və şəhərdaxili nəqliyyat sıxlığını azaltmaq üçün tunel və yolötürücülərin tikintisi planlaşdırılır.
Elpress.az xəbər verir ki, Azərbaycan Avtomobil Yolları Dövlət Agentliyinin məlumatına görə, nəzərdə tutulan işlər Bakı və ətraf ərazilərdə nəqliyyat infrastrukturunun inkişafını əhatə edən 2025–2030-cu illər Dövlət Proqramındakı 24 layihədən ikisidir.
Layihələrdən biri M-1 və M-4 magistralları ilə əlaqələrin genişləndirilməsini, yeni tunel və əlaqələndirici yolların salınmasını, eləcə də mövcud yol qovşaqlarının yenidən qurulmasını nəzərdə tutur.
Digər layihə isə M-4 magistralından Xırdalanın mərkəzinə birbaşa bağlantının yaradılmasını əhatə edir. Bu məqsədlə tunel və müxtəlif səviyyəli yolötürücüsünün inşası planlaşdırılır.
Agentlik bildirir ki, şəhərdən keçən dəmir yolu xətti Xırdalanı iki hissəyə ayırır. Keçidlərin məhdud olması sürücülərin əlavə məsafə qət etməsinə, küçələrdə sıxlığın artmasına və magistrallara çıxışın çətinləşməsinə səbəb olur.
Yeni bağlantıların yaradılması ilə nəqliyyat axınının müxtəlif istiqamətlərə bölüşdürülməsi və şəhərdaxili yollarda tıxacların azaldılması gözlənilir.
