Bu gün görkəmli skripkaçı, dirijor, Xalq artisti Sərvər Qəniyevin anadan olmasının 89-cu ildönümü qeyd olunur.
Elpress.az xəbər verir ki, Azərbaycan musiqi sənətinin tanınmış nümayəndələrindən olan Sərvər Qəniyev uzun illər skripka ifaçılığı, dirijorluq və pedaqoji fəaliyyəti ilə ölkənin musiqi həyatında mühüm rol oynayıb.
İlk musiqi təhsilini Azərbaycan Konservatoriyasının nəzdindəki musiqi məktəbində alan sənətkar sonradan təhsilini Pyotr Çaykovski adına Moskva Dövlət Konservatoriyasında davam etdirib. Təhsilini başa vurduqdan sonra Bakıya qayıdan Sərvər Qəniyev Azərbaycan Dövlət Konservatoriyasında müəllim, daha sonra professor və kafedra müdiri kimi fəaliyyət göstərib.1965-ci ildə onun təşəbbüsü ilə konservatoriyanın nəzdində simli kvartet yaradılıb. 1991-ci ildən etibarən isə Türkiyənin Bilkənd Universitetində professor, kamera və simfonik orkestrinin bədii rəhbəri və dirijoru kimi çalışıb.Musiqi sənətinin inkişafındakı xidmətlərinə görə Sərvər Qəniyev 1967-ci ildə “Əməkdar artist”, 1982-ci ildə “Xalq artisti” fəxri adlarına layiq görülüb, 2007-ci ildə isə “Şöhrət” ordeni ilə təltif edilib.
Qeyd edək ki, Sərvər Qəniyev 2010-cu il sentyabrın 5-də Türkiyənin Ankara şəhərində vəfat edib.
