Bu gün dünya şöhrətli dirijor və bəstəkar Niyazi Tağızadə-Hacıbəyovun anadan olmasının 114-cü ildönümüdür.
Elpress.az xəbər verir ki, Niyazi Azərbaycan musiqi mədəniyyətinin inkişafında mühüm rol oynayıb. O, milli bəstəkarların bir çox simfonik və səhnə əsərlərinin ilk təfsirçisi olmaqla yanaşı, onların ifasına özünəməxsus üslub gətirib.Niyazinin mənzil-muzeyinin müdiri, Əməkdar mədəniyyət işçisi Rza Bayramov bildirib ki, Azərbaycan professional dirijorluq məktəbinin formalaşması və inkişafı məhz Niyazinin adı ilə bağlıdır.Onun sözlərinə görə, maestro Azərbaycan bəstəkarlarının demək olar ki, bütün simfonik əsərlərinin ilk ifaçısı olub və bütöv bir bəstəkar nəslinin yetişməsinə böyük töhfə verib. Bir çox sənətkarın yaradıcılıq inkişafında Niyazi məktəbinin mühüm rolu olub.Niyazi bəstəkar kimi də milli simfonizmin inkişafında mühüm iz qoyub. Onun “Rast” simfonik muğamı, “Xosrov və Şirin” operası və “Çitra” baleti yaradıcılığının seçilən nümunələri sırasında yer alır.Maestro 1930-cu illərin əvvəllərində “Od içində” fortepiano poemasını, daha sonra “Talış xalq mahnıları” mövzusunda fortepiano əsərlərini və “Zaqatala süitası”nı yaradıb. 1949-cu ildə isə ən məşhur əsərlərindən biri olan “Rast” simfonik muğamını nota alıb.Dirijor kimi şöhrəti gənc yaşlarından artan Niyazi 1946-cı ildə gənc dirijorların müsabiqəsində laureat olub. 1951-ci ildə “Praqa baharı” festivalında iştirak edən maestro sonrakı illərdə dünyanın 23 ölkəsində qastrol səfərlərində olub.Rza Bayramov Niyazini Azərbaycan kino və teatr musiqisinin inkişafında xidmətləri olan ilk bəstəkarlardan biri kimi də qeyd edib.Onun sözlərinə görə, Niyazi kimi sənətkarlar tarixdə nadir hallarda yetişir və belə şəxsiyyətlər xalqın milli qüruruna çevrilir.
Maestro Niyazinin yaradıcılıq irsi bu gün də yeni nəsillər üçün mühüm sənət məktəbi olaraq qalır.
