Bakı Limanı Orta Dəhliz üzrə artan yük həcminə hazırlaşır
Elpress.az xəbər verir ki, Dünyada baş verən geoiqtisadi proseslər və müxtəlif regionlardakı toqquşmalar Bakı Limanının fəaliyyətinə də təsir göstərir.Bakı Limanının baş direktoru Eldar Salahov bildirib ki, yaranan vəziyyət nəticəsində əvvəlcədən nəzərdə tutulmayan əlavə yük həcmləri formalaşa bilər. Eyni zamanda, Orta Dəhliz üzrə yük daşımalarının artması limanın qarşısında yeni tələblər yaradır.Onun sözlərinə görə, artan yük axınının effektiv şəkildə idarə olunması üçün limanda müvafiq hazırlıq işləri aparılır. Bu çərçivədə yeni yük aşırma avadanlıqlarının, lokomobillərin, kranların, konteyner yükləyicilərinin və digər texniki vasitələrin alınması istiqamətində fəaliyyət davam etdirilir.Eldar Salahov qeyd edib ki, yalnız texniki imkanların genişləndirilməsi kifayət etmir. Yüklərin daha səmərəli qəbul və emal olunması üçün əməliyyat proseslərinin təkmilləşdirilməsi, qurumlararası əlaqələndirmənin gücləndirilməsi və məlumat mübadiləsinin yaxşılaşdırılması da əsas prioritetlərdəndir.Bakı Limanı rəhbəri bildirib ki, görülən tədbirlər artan yük həcmlərinin qarşılanmasına və Orta Dəhliz üzrə daşımaların fasiləsizliyinin təmin edilməsinə xidmət edir.
