Restrukturizasiya zamanı borcalandan əlavə ödəniş tələb olunmayacaq
Elpress.az xəbər verir ki, Bank olmayan kredit təşkilatlarında gündəlik kredit borcunun restrukturizasiyası zamanı müştəridən əlavə ödəniş tələb edilməyəcək.Azərbaycan Mərkəzi Bankının Bank olmayan kredit təşkilatlarının fəaliyyətinə nəzarət departamentinin direktoru Xəyyam İsmayılov bildirib ki, yeni yanaşma sektorda yaranan problemlərin və neqativ halların qarşısının alınması, həmçinin istehlakçıların hüquqlarının qorunması məqsədi daşıyır.Yeni qaydalara əsasən, gündəlik kreditin maksimal məbləği 500 manat, gündəlik faiz dərəcəsi 0,3 faiz, kreditin maksimal qaytarılma müddəti isə 45 gün müəyyənləşdirilib.BOKT müştərinin kredit üzrə ödəyəcəyi bütün əlavə xərclərin məbləğini kreditin əsas məbləğinin 100 faizindən yuxarı müəyyən edə bilməz. Məsələn, 100 manat kredit götürən şəxsin əlavə xərcləri 100 manatdan çox ola bilməz.Gündəlik kreditlər üzrə daşınar və daşınmaz əmlakın təminat kimi qəbul edilməsi də qadağan edilib.Yeni qaydaya görə, müştəri kredit borcunun 20 faizini ödədikdən sonra qalan borcunu növbəti 45 gün müddətinə restrukturizasiya edə biləcək.AMB rəsmisi qeyd edib ki, restrukturizasiya zamanı da müştərinin ödəyəcəyi ümumi əlavə xərc kredit məbləğinin 100 faizi həddini keçməməlidir və borcalandan əlavə xərc tələb edilməməlidir.
