DİM-dən abituriyentlərə mühüm məlumat: Ümumi fiziki hazırlıq imtahanının yeni tarixi açıqlanıb
Elpress.az xəbər verir ki, idman istiqamətinin 62-ci komissiyası (ümumi fiziki hazırlıq, adaptiv bədən tərbiyəsi və kütləvi sağlamlaşdırıcı idman) üzrə iyunun 27-də keçirilməsi nəzərdə tutulan ümumi fiziki hazırlıq imtahanı təxirə salınıb.
Dövlət İmtahan Mərkəzinin məlumatına görə, Tofiq Bəhramov adına Respublika Stadionunda açıq havada təşkil olunması planlaşdırılan imtahan əlverişsiz hava şəraiti səbəbindən baş tutmayıb.
Bildirilib ki, sözügedən imtahan iyulun 7-də Azərbaycan İdman Akademiyasında keçiriləcək.
Abituriyentlər və subbakalavrlar imtahana gələrkən şəxsiyyət vəsiqəsinin əslini və qabiliyyət imtahanına buraxılış vərəqəsini özləri ilə gətirməlidirlər.
Bundan əlavə, idman istiqaməti üzrə imtahanda iştirak edəcək şəxslər idman geyimi, həmçinin U086 formalı sağlamlıq haqqında tibbi arayışı təqdim etməlidirlər. Arayışın “peşəyə yararlığı haqqında həkim rəyi” hissəsində “yararlıdır” və ya “sağlamdır” qeydi olmalıdır.
Qabiliyyət imtahanlarının qrafikinin mütəmadi yeniləndiyi, digər imtahanların tarixlərinin də müəyyənləşdikcə cədvələ əlavə ediləcəyi qeyd olunub.
