Elpress.az Apasport.az-a istinadən xəbər verir ki, Çexiyanın paytaxtı Praqada keçirilən cüdo üzrə Avropa Açıq Turnirinin ilk yarış günü Azərbaycan millisi üçün uğurlu alınıb.
Milli komandamız turnirin ilk gününü 1 qızıl, 1 gümüş və 1 bürünc medalla başa vurub.
-66 kq çəki dərəcəsində tatami üzərinə çıxan Elşən Əsədov bütün rəqiblərini məğlub edərək turnirin qalibi adını qazanıb. Həmin çəkidə mübarizə aparan digər təmsilçimiz Rəşad Yelkiyev isə finala qədər irəliləyərək gümüş medala sahib çıxıb.
-73 kq çəki dərəcəsində çıxış edən Kamran Süleymanov isə üçüncü yer uğrunda görüşdə qalib gələrək bürünc medala yiyələnib.
Əldə olunan nəticələr sayəsində Azərbaycan yığması 38 ölkənin iştirak etdiyi yarışda komanda hesabında ikinci pilləyə yüksəlib. Milli komandanın turnirin növbəti günlərində də medal sayını artıracağına ümid edilir.
