Sabirabad Rayon Mərkəzi Xəstəxanasının keçmiş direktoru Həsən Hüseynovun külli miqdarda mənimsəmə ittihamı üzrə cinayət işi məhkəmə baxışına çıxarılır.
Elpress.az xəbər verir ki, istintaqın materiallarına əsasən, Həsən Hüseynov vəzifə səlahiyyətlərindən istifadə edərək 186 min manat məbləğində vəsaiti mənimsəməkdə təqsirləndirilir.
Məlumata görə, təqsirləndirilən şəxs istintaq dövründə dəymiş ziyanın təxminən 20 min manatını ödəyib. Ona Azərbaycan Respublikası Cinayət Məcəlləsinin 179.3.2-ci maddəsi (külli miqdarda mənimsəmə) ilə yekun ittiham irəli sürülüb.Həsən Hüseynov barəsində istintaq müddətində başqa yerə getməmək haqqında qətimkan tədbiri seçilib.Cinayət işi baxılması üçün Lənkəran Ağır Cinayətlər Məhkəməsinə göndərilib. İşə hakim Cavid Səfərli baxacaq. Hazırlıq iclasının iyulun 31-də keçirilməsi nəzərdə tutulur.
Qeyd edək ki, Sabirabad Rayon Mərkəzi Xəstəxanasında maliyyə pozuntuları ilə bağlı digər vəzifəli şəxslərin cinayət işi üzrə məhkəmə araşdırması da hazırda davam edir.
