Azərbaycanın ev sahibliyi etdiyi 13-cü Ümumdünya Şəhərsalma Forumu (WUF13) çərçivəsində iştirakçıların daşınması Azərbaycan Yerüstü Nəqliyyat Agentliyi (AYNA) tərəfindən təşkil olunub.
Elpress.az-ın Azərbaycan Yerüstü Nəqliyyat Agentliyinə (AYNA) istiandən verdiyi məlumata görə, qonaqların rahat və fasiləsiz hərəkəti üçün “Neoplan” markalı və elektriklə işləyən avtobuslardan istifadə edilir.
Forum iştirakçılarının qarşılanması əsasən Heydər Əliyev Beynəlxalq Aeroportu vasitəsilə həyata keçirilir və oradan HUB məntəqələrinə daşınma təmin olunur.
Tədbir müddətində 9 HUB, 2 son dayanacaq və 67-dən çox aralıq dayanacaq fəaliyyət göstərir.
Məlumata görə, 17–19 may tarixlərində HUB-lar və tədbir məkanı arasında 3 260 reys həyata keçirilib və 56 858 sərnişin daşınıb.
Ümumilikdə 12–19 may dövrünü əhatə edən daşımalar ərzində isə 5 555 reys icra olunub və 68 263 sərnişin xidmətlə təmin edilib.
Bu prosesə 180 avtobus cəlb olunub və ümumi nəqliyyat əməliyyatlarının idarə olunması AYNA-nın Monitorinq Mərkəzi tərəfindən fasiləsiz olaraq izlənilib.
Bütün əməliyyatların həyata keçirilməsində sürücü və inzibati heyət də daxil olmaqla təxminən 1500 nəfər əməkdaş iştirak edib.
