Stansiyaların ətrafında 800 metrlik piyada əlçatanlıq radiusunun müəyyənləşdirilməsi təklif olunur
Elpress.az xəbər verir ki, Metro stansiyalarının şəhər sakinləri üçün piyada əlçatanlığını qiymətləndirmək məqsədilə stansiyaların ətrafında müəyyən məsafəni əhatə edən zonaların formalaşdırılması nəzərdə tutula bilər.Mütəxəssislərin yanaşmasına əsasən, piyada əlçatan məsafə adətən 5-15 dəqiqə ərzində qət edilə bilən 400-1200 metr aralığında hesab olunur. Orta hesabla 10 dəqiqə ərzində 800 metr məsafə qət etmək mümkün olduğundan, metro stansiyaları üçün də 800 metrlik radius əsas götürülə bilər.Bu yanaşma tətbiq edilərsə, həm mövcud, həm də dövlət proqramı çərçivəsində tikilməsi planlaşdırılan metro stansiyalarının ətrafında piyada əlçatanlıq zonaları müəyyənləşəcək.Lakin real piyada əlçatanlığını yalnız xəritədəki məsafə ilə müəyyənləşdirmək mümkün deyil. Səkilərin vəziyyəti, piyada keçidlərinin təhlükəsizliyi, panduslar, küçələr arasındakı bağlantılar və digər infrastruktur imkanları da nəzərə alınmalıdır.Bu səbəbdən xəritədə 800 metr kimi göstərilən məsafə faktiki olaraq piyada üçün eyni uzunluqda olmaya bilər. Piyada marşrutlarının rahat və təhlükəsiz olması metro stansiyalarının əlçatanlığının əsas şərtlərindən biridir.
