Ali təhsil müəssisələrinə qəbul olmaq istəyən abituriyentlər üçün ixtisas seçiminin başlanacağı vaxt məlum olub.
Elpress.az xəbər verir ki, bu barədə Dövlət İmtahan Mərkəzinin aparat rəhbəri Vəfadar Misirov jurnalistlərə açıqlamasında məlumat verib.Onun sözlərinə görə, blok və qabiliyyət imtahanlarının nəticələri, eləcə də apellyasiya prosesi başa çatdıqdan sonra ixtisas seçiminə start veriləcək.
Bildirilib ki, qəbul planı avqustun əvvəlində “Abituriyent” jurnalında dərc olunacaq, ixtisas seçiminin isə ənənəvi qaydada avqustun 10-dan sonra keçirilməsi nəzərdə tutulur.Vəfadar Misirov qeyd edib ki, bu il də xüsusilə IV ixtisas qrupu üzrə yüksək rəqabət gözlənilir. Onun sözlərinə görə, tibb ixtisaslarına qəbul zamanı əsas mübarizə yüksək bal toplayan abituriyentlər arasında olacaq.
Aparat rəhbəri əlavə edib ki, Dövlət İmtahan Mərkəzinin təşkil etdiyi ali təhsil müəssisələrinin sərgisində universitetlərin təhsil imkanları, təqaüd proqramları və maddi-texniki bazası barədə geniş məlumat təqdim olunur. Sərgidə 40-a yaxın dövlət və özəl ali təhsil müəssisəsi, eləcə də bir sıra aidiyyəti qurumlar iştirak edir.
