Ali məktəblərə qəbul imtahanı zamanı qayda pozuntusuna yol verməyə çalışan şəxs müəyyən edilərək imtahandan uzaqlaşdırılıb. Hadisə V ixtisas qrupu üzrə keçirilən qabiliyyət imtahanında qeydə alınıb.
Elpress.az xəbər verir ki, Dövlət İmtahan Mərkəzi (DİM) ali təhsil müəssisələrinin V ixtisas qrupu üzrə İdman istiqamətinə aid keçirilən qabiliyyət imtahanı zamanı qayda pozuntusu aşkar edib. Belə ki, bir nəfər başqa bir abituriyentin yerinə imtahana daxil olmağa cəhd göstərib.DİM-in yaydığı məlumata əsasən, yoxlama zamanı həmin şəxsin əsl kimliyi müəyyən olunub və o, imtahanda iştirak etməsinə icazə verilmədən zaldan uzaqlaşdırılıb.Qurum bildirib ki, belə hallarda həm imtahanda iştirak etməli olan şəxs, həm də onun yerinə imtahana girməyə cəhd edən şəxs məsuliyyət daşıyır. Qaydalara əsasən, əsl namizədin bütün imtahan nəticələri ləğv edilir və o, müsabiqədən kənarlaşdırılır. Başqasının yerinə imtahana daxil olmağa çalışan şəxs isə qanunvericiliyə uyğun hüquqi məsuliyyət daşıyır.DİM qeyd edib ki, bu cür qayda pozuntularına yol verən şəxslər arasında bəzən ali təhsil müəssisələrinin tələbələri də olur və belə hallarda onların universitetdən xaric olunması ehtimalı mövcuddur. Əvvəlki illərdə də oxşar faktlarla bağlı hüquq-mühafizə orqanları tərəfindən araşdırmalar aparılıb və məhkəmə qərarları qəbul edilib.Dövlət İmtahan Mərkəzi vətəndaşları imtahan qaydalarına ciddi əməl etməyə çağıraraq bildirib ki, qanunvericiliyin tələblərini pozan şəxslərə qarşı bundan sonra da müvafiq tədbirlər görüləcək.
