Güclü yağış, külək və ildırım gözlənilir: FHN təhlükəsizlik qaydalarını açıqladı
Elpress.az xəbər verir ki, Fövqəladə Hallar Nazirliyi ölkə ərazisində gözlənilən qeyri-sabit hava şəraiti ilə əlaqədar əhaliyə müraciət edib.Milli Hidrometeorologiya Xidmətinin proqnozlarına əsasən, avqustun 30-u axşamdan sentyabrın 1-dək ayrı-ayrı ərazilərdə intensiv yağış, güclü külək və şimşək müşahidə oluna bilər. Bəzi dağ çaylarında qısamüddətli sel və daşqınların baş verməsi də istisna edilmir.FHN sel və daşqın təhlükəsi olan ərazilərdən uzaq durmağı, təhlükə yarandıqda isə daha yüksək ərazilərə çəkilməyi tövsiyə edib. Güclü külək zamanı müvəqqəti və yüngül konstruksiyalardan, reklam lövhələrindən, elektrik dirəklərindən və hündür ağaclardan uzaq dayanmaq çağırışı edilib.Nazirlik kiçikhəcmli gəmilərin belə hava şəraitində dənizə çıxmamasını, güclü külək zamanı isə çimərliklərdə suya girməməsini də tövsiyə edib.İldırım çaxarkən elektrik cihazlarının şəbəkədən ayrılması, açıq ərazidə elektrik xətləri, antenalar və hündür ağaclardan uzaq durulması, avtomobildə olan şəxslərin isə hərəkəti dayandıraraq ildırımın keçməsini gözləməsi məsləhət görülüb.FHN təhlükə ilə üzləşən şəxslərə 112 qaynar xəttinə müraciət etməyi xatırladıb.
