Beynəlxalq hesabatda dünyanın həyat keyfiyyəti üzrə ən əlverişli ölkələrinin reytinqi açıqlanıb.
Elpress.az xəbər verir ki, siyahıda Azərbaycan da yer alıb.Hesabata əsasən, ölkəmiz həyat keyfiyyəti göstəricisinə görə 167 ölkə arasında 81-ci sırada qərarlaşıb. Eyni zamanda Azərbaycan təhlükəsizlik reytinqində 93-cü, investisiya mühitinə görə 54-cü, biznes mühitinə görə 47-ci, təhsil sistemi üzrə isə 79-cu pillədə göstərilib.
Sənəddə Azərbaycanın əhalisinin savadlılıq səviyyəsinin maksimum – 100 bal olduğu qeyd edilir. Bildirilir ki, səhiyyə sahəsində həyata keçirilən islahatlar və icbari tibbi sığorta sistemi tibbi xidmətlərə çıxışı genişləndirib.
Hesabat müəllifləri Cənubi Qafqaz regionunu dünyanın daha təhlükəsiz bölgələrindən biri kimi qiymətləndiriblər. Azərbaycanın cinayətkarlıq səviyyəsinin aşağı olması da ölkənin mövqeyinə müsbət təsir göstərən əsas amillərdən biri kimi göstərilib.
Reytinqdə ilk sıralarda əsasən Şimali Avropa ölkələri qərarlaşıb, son pillələrdə isə uzunmüddətli münaqişələr və qeyri-sabitlik yaşayan dövlətlər yer alıb.
