Fukui prefekturasında 111 minə yaxın sakinə təxliyə çağırışı olunub
Elpress.az xəbər verir ki, Yaponiyanın Fukui prefekturasında yağan güclü yağışlar səbəbindən təbii fəlakət riski artıb və əhaliyə xəbərdarlıq edilib.“Kyodo”nun məlumatına görə, Fukui, Ono və Katsuyama şəhərlərində əvvəlcə güclü yağışla bağlı ən yüksək – 5-ci səviyyəli xəbərdarlıq qüvvəyə minib. Daha sonra xəbərdarlıq 4-cü səviyyəyə endirilib. Buna baxmayaraq, təhlükəli ərazilərdə yaşayan sakinlərə təxliyə olunmaları tövsiyə edilib.Güclü yağıntılar nəticəsində bəzi yollar və yaşayış evləri su altında qalıb, çaylarda suyun səviyyəsi əhəmiyyətli dərəcədə yüksəlib. Beş bələdiyyədə təxminən 111 min nəfərə təhlükəsiz ərazilərə köçmək çağırışı edilib.Katsuyama, Sakai və Fukui şəhərlərində bazar günü səhərədək yağıntının miqdarı 300 millimetrdən çox olub. Sakai şəhərində su səviyyəsinin yüksəlməsinin qarşısını almaq üçün bənddən əlavə su buraxılması da nəzərdən keçirilir.Meteoroloqlar qeyri-sabit atmosfer şəraiti ilə əlaqədar Yaponiyanın qərbindən şərqinə qədər geniş ərazidə güclü yağışların davam edəcəyini proqnozlaşdırırlar. Hokuriku regionunda 24 saat ərzində 120 millimetrədək, Çuqoku regionunda isə 80 millimetrədək yağıntı düşə biləcəyi bildirilir.
