Yaponiya sahillərində yerləşən sualtı vulkanik kraterdə indiyədək qeydə alınmış ən yüksək qızıl konsentrasiyası müəyyən edilib.
Elpress.az xəbər verir ki, “Scientific Reports” jurnalında dərc olunan araşdırmaya əsasən, Tokio şəhərindən təxminən 350 kilometr cənubda, İzu adaları yaxınlığındakı Hiqaşi-Aoqaşima kalderasında rekord həcmdə qızıl ehtiyatı aşkarlanıb.Şizuoka, Vaseda və Tokio universitetlərinin alimləri hidrotermal yataqlardan robot qollar vasitəsilə götürdükləri qaya nümunələrini müasir analiz üsulları ilə araşdıraraq okeanın dibində çılpaq gözlə görünməyən “görünməz qızıl” yataqlarını müəyyən ediblər.Tədqiqatın nəticələrinə görə, qızıl hissəcikləri “saxta qızıl” kimi tanınan pirit mineralının daxilində atom və nanopartikül formasında yerləşir. Alimlər bildirirlər ki, bu bölgədəki pirit yataqları hazırda dünyada qeydə alınan ən yüksək qızıl konsentrasiyasına malikdir.Mütəxəssislərin sözlərinə görə, yatağın digər oxşar sahələrə nisbətən daha dayaz dərinlikdə yerləşməsi gələcəkdə hasilat baxımından üstünlük yarada bilər. Bununla yanaşı, onlar dərin dəniz mədənçiliyinin mərcanlar, süngərlər, xərçəngkimilər və digər dəniz canlılarının yaşadığı həssas ekosistemlər üçün ciddi risklər daşıdığını da vurğulayırlar.Hazırda dünyada kommersiya məqsədilə fəaliyyət göstərən dərin dəniz qızıl mədənləri mövcud olmasa da, Yaponiya bu sahədə araşdırmalarını davam etdirir.
