Qaradağ rayonunda palçıq vulkanlarının mühafizəsi, elmi tədqiqi və ekoloji əhəmiyyətinə həsr olunmuş tədbir keçirilib.
Elpress.az xəbər verir ki, tədbirdə palçıq vulkanlarının qorunmasının yalnız elmi deyil, həm də mühüm ekoloji və ictimai məsuliyyət məsələsi olduğu diqqətə çatdırılıb. Bu təbiət abidələrinin mühafizəsi, ekoloji təhlükəsizliyin təmin edilməsi və əhali arasında maarifləndirmə işlərinin genişləndirilməsinin vacibliyi vurğulanıb.
Çıxışlarda bildirilib ki, Qaradağ rayonunda yerləşən palçıq vulkanları Azərbaycanın zəngin geoloji və təbii irsinin mühüm hissəsini təşkil edir. Bu unikal təbiət abidələrinin qorunması ilə yanaşı, onların elmi əsaslarla öyrənilməsi, ətraf mühitin təhlükəsizliyinin təmin olunması və turizm potensialından dayanıqlı şəkildə istifadə edilməsi xüsusi əhəmiyyət daşıyır.
Tədbir çərçivəsində palçıq vulkanlarının ekoloji əhəmiyyəti, onların mühafizəsi və elmi tədqiqi ilə bağlı fikir mübadiləsi aparılıb. İştirakçıların sualları cavablandırılıb, mövzu ətrafında geniş müzakirələr keçirilib.Tədbirdə təbiətin və təbii sərvətlərin qorunması istiqamətində çalışan əməkdaşların fəaliyyəti də diqqətdə saxlanılıb. Təbii sərvətlərin mühafizəsində göstərdikləri səmərəli və məsuliyyətli fəaliyyətə görə 8 nəfər əməkdaş təltif olunub.
Qeyd olunub ki, palçıq vulkanlarının qorunması həm təbiət irsinin gələcək nəsillərə çatdırılması, həm də ekoloji təhlükəsizliyin təmin edilməsi baxımından mühüm əhəmiyyət daşıyır.Belə tədbirlərin keçirilməsi cəmiyyətdə ekoloji maarifləndirmənin gücləndirilməsinə, təbiətə məsuliyyətli münasibətin formalaşdırılmasına və Azərbaycanın nadir təbiət abidələrinin qorunmasına töhfə verir.
