İqlim Forumunda gənclərin qərarvermə proseslərinə daha fəal cəlb olunmasının vacibliyi vurğulanıb
Elpress.az xəbər verir ki, Bakı İqlim Həftəsi çərçivəsində keçirilən “Youth-led Climate Forum”da gənclərin iqlim dəyişikliyi ilə mübarizədə iştirakı və onların qərarvermə proseslərində rolunun artırılması məsələləri müzakirə olunub.Tədbirdə iqlim sahəsində qəbul edilən öhdəliklərin real nəticələrə çevrilməsi, gənclərin təşəbbüslərinin dəstəklənməsi və onların iqlim siyasətində iştirak imkanlarının genişləndirilməsi ilə bağlı fikir mübadiləsi aparılıb.COP31-in Gənclər üzrə İqlim Çempionu Salli Higgins bildirib ki, iqlim fəaliyyətinin uğuru yalnız verilən vədlərlə deyil, onların praktiki nəticələri ilə qiymətləndirilməlidir. Onun sözlərinə görə, dünya əhalisinin böyük hissəsinin 35 yaşdan aşağı olması gəncləri iqlim mübarizəsində əsas qüvvələrdən birinə çevirir.Azərbaycan Prezidentinin iqlim məsələləri üzrə nümayəndəsi və COP29-un Prezidenti Muxtar Babayev isə gənclərin iqlim prosesində rolunun yalnız gələcəklə əlaqələndirilməsinin doğru olmadığını deyib. O qeyd edib ki, bu gün qəbul edilən qərarlar birbaşa gənc nəslin gələcəyinə təsir göstərir və onların bilik, ideya və seçimləri qarşıdakı dövrün formalaşmasında mühüm əhəmiyyət daşıyır.Xarici işlər nazirinin müavini Yalçın Rəfiyev də gənclərin cəmiyyətin inkişafında mühüm rol oynadığını vurğulayıb. O bildirib ki, uşaqlar və gənclər iqlim dəyişmələrinə ən az təsir edən qruplar sırasında olsalar da, onların nəticələrdən zərər görmə ehtimalı daha yüksəkdir.Rəfiyev gənclərin iqlim həllərinin hazırlanmasında iştirak etdiyini, innovasiyaları təşviq etdiyini və daha fəal iqlim siyasətinə çağırışlar etdiyini qeyd edib. Onun fikrincə, gənclərin bilik və bacarıqlarının inkişaf etdirilməsi, eləcə də qərar qəbuletmə proseslərinə real şəkildə cəlb olunması dayanıqlı, aşağı karbonlu və iqlim dəyişmələrinə davamlı gələcəyin qurulması üçün vacibdir.
