Elpress.az xəbər verir ki, Türkiyənin Ankara şəhərinin Etimesgut bələdiyyəsinin sədri, tanınmış aktyor Erdal Beşikçioğlu korrupsiya istintaqı çərçivəsində saxlanıldıqdan sonra vəzifəsindən müvəqqəti uzaqlaşdırılıb.
Məlumata görə, Cümhuriyyət Xalq Partiyasının (CHP) rəhbərlik etdiyi Etimesgut bələdiyyəsində aparılan korrupsiya araşdırması çərçivəsində ümumilikdə 55 nəfər barəsində tədbir görülüb. Onlardan 40 nəfər həbs edilib, 4 nəfər isə məhkəmə nəzarəti şərti ilə azadlığa buraxılıb.
Türkiyənin Daxili İşlər Nazirliyi bildirib ki, Erdal Beşikçioğlu barəsində aparılan istintaq səbəbindən onun bələdiyyə sədri vəzifəsinin icrası müvəqqəti dayandırılıb. Ona qarşı cinayət məqsədilə təşkilat yaratmaq, dövlət qurumlarının fəaliyyətinə mane olmaq, tender proseslərinə müdaxilə, mənimsəmə və rüşvətxorluq kimi ittihamlar irəli sürülüb.
Qeyd edək ki, Erdal Beşikçioğlu təkcə siyasətçi deyil, həm də Türkiyənin tanınmış aktyorlarından biri kimi geniş ictimaiyyət tərəfindən tanınır. Hazırda faktla bağlı istintaq davam etdirilir.
