Elpress.az xəbər verir ki, bu il Azərbaycanda 125 mindən çox uşaq ilk dəfə məktəbə qədəm qoyaraq təhsil həyatının yeni mərhələsinə başlayacaq.
Bunu elm və təhsil naziri Emin Əmrullayev Bilik Günü münasibətilə Bakı şəhəri, Yasamal rayonunda yerləşən 21 nömrəli tam orta məktəbdə çıxışı zamanı bildirib.
Nazir qeyd edib ki, 125 mindən çox uşağın birinci sinfə başlaması onlar üçün həyatlarının yeni mərhələsinin başlanması deməkdir. Onun sözlərinə görə, məktəb illərində əldə olunan bilik və təcrübənin insan həyatında xüsusi əhəmiyyəti var.
Emin Əmrullayev şagirdlərin qarşısında duran əsas vəzifələrdən də danışıb. O vurğulayıb ki, uşaqlar yaxşı şagird olmaqla yanaşı, yaxşı insan kimi formalaşmağa da çalışmalıdırlar.
Nazir yeni tədris ilinin başlanması münasibətilə müəllimlərə uğurlar arzulayıb, valideynləri də təbrik edib.
Emin Əmrullayev valideynlərin tədris prosesində müəllimlərlə əməkdaşlıq etməsinin vacibliyini qeyd edərək, birgə fəaliyyətin daha böyük nəticələrə gətirib çıxara biləcəyini bildirib.
