Elpress.az xəbər verir ki, TƏBİB-in (Tibbi Ərazi Bölmələrini İdarəetmə Birliyi) icraçı direktoru Anar Bayramov işğaldan azad edilmiş ərazilərdə fəaliyyət göstərən tibb müəssisələrinə baxış keçirib.
Səfərin əsas məqsədi azad olunmuş ərazilərdə əhaliyə göstərilən tibbi xidmətlərin keyfiyyətinin yüksəldilməsi, pasiyentyönümlü səhiyyə xidmətlərinin əlçatanlığının artırılması, mövcud vəziyyətin qiymətləndirilməsi və gələcək inkişaf istiqamətlərinin müəyyənləşdirilməsi olub.
İki günlük səfərin ilk günündə Ağdərə rayonu ərazisində yerləşən Talış kənd Ailə Sağlamlıq Mərkəzi və Suqovuşan həkim məntəqəsi, həmçinin Tərtər Rayon Mərkəzi Xəstəxanası, Ağdam Rayon Mərkəzi Xəstəxanasının tabeliyində fəaliyyət göstərən Kəngərli tibb məntəqəsi, Saraçlı həkim məntəqəsi və Ağdam Modul Tipli Xəstəxanasının fəaliyyəti ilə tanışlıq olub. Baxış zamanı tibb müəssisələrinin fəaliyyəti, infrastruktur imkanları, maddi-texniki bazası, tibbi avadanlıqlarla təminatı, kadr potensialı, vətəndaşlara göstərilən tibbi xidmətlərin təşkili və iş prosesinin daha da təkmilləşdirilməsi istiqamətində aidiyyəti şəxslərlə müzakirələr aparılıb.
Səfər çərçivəsində işğaldan azad olunmuş ərazilərdə səhiyyə xidmətlərinin daha da inkişaf etdirilməsi, müasir tibbi xidmətlərin əlçatanlığının artırılması və əhalinin keyfiyyətli tibbi xidmətlə təmin olunması ilə bağlı görüləcək işlər də nəzərdən keçirilib.
