İyunun 22-də Azərbaycan Prezidenti İlham Əliyev ilə Türkmənistan Prezidenti Sərdar Berdiməhəmmədov arasında geniş tərkibdə görüş baş tutub.
Görüş zamanı Azərbaycan lideri Türkmənistan Prezidentinin Azərbaycana dövlət səfərinin ölkələr arasında dostluq və qardaşlıq münasibətlərinin daha da möhkəmlənməsinə töhfə verəcəyinə əminliyini ifadə edib.Tərəflər iki ölkə arasında əməkdaşlığın müxtəlif istiqamətlərini, o cümlədən iqtisadiyyat, enerji, nəqliyyat, humanitar əlaqələr və qarşılıqlı fəaliyyət məsələlərini müzakirə ediblər. Prezident İlham Əliyev qarşıdakı dövrdə imzalanacaq sənədlərin münasibətlərin geniş gündəliyinin göstəricisi olduğunu vurğulayıb.Azərbaycan Prezidenti həmçinin Türkmənistanın Füzuli şəhərində məscid hədiyyə etməsi ilə bağlı təşəbbüsə görə təşəkkür edib və bunu xalqlar arasında səmimi qardaşlıq münasibətlərinin nümunəsi kimi qiymətləndirib.Görüşdə mədəni əlaqələrin inkişafı, xalqların ortaq tarixi və humanitar əməkdaşlığın əhəmiyyəti də qeyd olunub. Liderlər nəqliyyat və enerji təhlükəsizliyi sahələrində Azərbaycan-Türkmənistan əməkdaşlığının regional və qlobal əhəmiyyət daşıdığını bildiriblər.
