Azərbaycanın xarici işlər naziri Ceyhun Bayramov ilə İsveçrə Konfederasiyasının Federal Şurasının üzvü, Xarici İşlər Departamentinin rəhbəri və ATƏT-in fəaliyyətdə olan sədri İqnatsio Kassis arasında geniş tərkibdə görüş keçirilib.
Elpress.az xəbər verir ki, görüşdə Azərbaycan–İsveçrə ikitərəfli münasibətləri, ATƏT çərçivəsində əməkdaşlıq, təşkilatın fəaliyyət prioritetləri, regional və beynəlxalq təhlükəsizlik məsələləri müzakirə olunub.Tərəflər Xarici İşlər nazirlikləri arasında siyasi məsləhətləşmələrin davam etdirilməsinin vacibliyini vurğulayıb, iqtisadi əməkdaşlığın genişləndirilməsi, enerji sahəsində tərəfdaşlıq və SOCAR-ın İsveçrədəki fəaliyyəti ətrafında fikir mübadiləsi aparıblar.
Nazir Ceyhun Bayramov ATƏT-in regional təhlükəsizliyin təmin olunmasında rolunun gücləndirilməsinin vacibliyini qeyd edib, Azərbaycanın təşkilatla qarşılıqlı maraq doğuran istiqamətlər üzrə praktiki əməkdaşlığı davam etdirməyə hazır olduğunu bildirib.
Görüşdə Ermənistan–Azərbaycan münasibətlərinin normallaşdırılması prosesi, sülh gündəliyinin hazırkı vəziyyəti, Azərbaycanın mina problemi, eləcə də Ukrayna, Yaxın Şərq və digər beynəlxalq təhlükəsizlik məsələləri ətrafında geniş fikir mübadiləsi aparılıb.
