Azərbaycan TVP World-də yayımlanan süjetə görə Polşaya etiraz edib
Elpress.az xəbər verir ki, Polşanın Azərbaycandakı fövqəladə və səlahiyyətli səfiri Pavel Radomski Xarici İşlər Nazirliyinə çağırılıb.Görüş zamanı avqustun 26-da Polşanın ictimai yayım qurumu TVP-nin “TVP World” kanalında yayımlanan “Eastern Express” verilişində Azərbaycanla bağlı təqdim olunan material müzakirə edilib. Azərbaycan tərəfi süjetdə ölkəyə və dövlət rəhbərliyinə qarşı qərəzli və qeyri-obyektiv fikirlərin səsləndirilməsinə, həmçinin veriliş aparıcısının təxribat xarakterli davranışına görə kəskin narazılığını bildirib. Bununla bağlı Polşa tərəfinə etiraz notası təqdim olunub.XİN tərəfindən bildirilib ki, Azərbaycanla Ermənistan arasında sülh və normallaşma prosesinin davam etdiyi, eləcə də regionda sabitlik və təhlükəsizliyin təmin olunması istiqamətində səylərin göstərildiyi bir vaxtda həqiqəti əks etdirməyən məlumatların yayılması narahatlıq doğurur.Azərbaycan tərəfi Polşa hökuməti tərəfindən maliyyələşdirilən ictimai yayım qurumunda ölkəyə qarşı mənfi məzmunun yayımlanmasını iki dövlət arasındakı tərəfdaşlıq münasibətlərinə uyğun olmayan və əlaqələrə mənfi təsir göstərə biləcək addım kimi qiymətləndirib.Polşa tərəfi Azərbaycana qarşı bu xarakterli təxribatçı kampaniyaların qarşısının alınması üçün təcili və effektiv tədbirlər görməyə çağırılıb.
