Azərbaycanın son üç onillikdə keçdiyi inkişaf yolu ölkənin regional gücdən qlobal əhəmiyyət daşıyan strateji tərəfdaşa çevrildiyini göstərir.
Elpress.az AZƏRTAC-a istinadən xəbər verir ki, bu fikirləri siyasi şərhçi Araz Balayev səsləndirib.Onun sözlərinə görə, Azərbaycanın milli təhlükəsizlik və xarici siyasət kursunda enerji diplomatiyası mühüm yer tutur. Araz Balayev qeyd edib ki, XX əsrin sonlarında ümummilli lider Heydər Əliyevin təşəbbüsü ilə imzalanan “Əsrin müqaviləsi” yalnız iqtisadi layihə deyil, həm də ölkənin beynəlxalq arenada mövqeyini gücləndirən strateji addım olub.Şərhçinin fikrincə, enerji resurslarından düzgün istifadə Azərbaycanın siyasi və iqtisadi müstəqilliyinin möhkəmlənməsinə, maliyyə dayanıqlığının təmin olunmasına və ordunun gücləndirilməsinə imkan yaradıb. Eyni zamanda, əldə olunan gəlirlər insan kapitalının inkişafına, təhsil proqramlarının həyata keçirilməsinə və yeni nəslin formalaşdırılmasına yönəldilib.Araz Balayev vurğulayıb ki, bu gün Azərbaycan yalnız enerji ehtiyatları ilə deyil, həm də çevik idarəetmə sistemi və rəqabətqabiliyyətli insan resursları ilə seçilir. Onun sözlərinə görə, Bakı-Tbilisi-Ceyhan, TANAP və TAP kimi layihələr ölkənin qlobal enerji bazarındakı rolunu daha da gücləndirib.Siyasi şərhçi bildirib ki, xüsusilə son illərdə Avropada yaranan enerji böhranı fonunda Azərbaycanın etibarlı tərəfdaş kimi əhəmiyyəti daha da artıb. Onun fikrincə, ölkə artıq təkcə qaz ixracatçısı deyil, həm də yaşıl enerji sahəsində yeni imkanlar yaradan mühüm mərkəzə çevrilməkdədir.Araz Balayev hesab edir ki, Azərbaycan bu gün Şərqlə Qərb arasında strateji enerji bağlantısını təmin edən və qlobal geosiyasi proseslərdə təsir imkanlarına malik mühüm oyunçulardan biridir.
