Türkiyə və Rusiya Cənubi Qafqazdakı vəziyyəti müzakirə edib

Elpress.az xəbər verir ki, Türkiyə və Rusiya arasında keçirilən diplomatik məsləhətləşmələr zamanı Cənubi Qafqaz və Mərkəzi Asiyadakı proseslər diqqət mərkəzində olub.
Görüşdə tərəflər regional təhlükəsizlik və sabitlik məsələləri ilə yanaşı, Rusiya-Ukrayna münaqişəsi barədə də fikir mübadiləsi aparıblar.
Müzakirələrdə Türkiyəni Şərqi Avropa və Cənubi Qafqaz üzrə Baş idarənin rəhbəri, səfir Mehmet Samsar, Rusiyanı isə xarici işlər nazirinin müavini Mixail Qaluzin təmsil edib.
Tərəflər Mərkəzi Asiya və Cənubi Qafqazda regiondan kənar təşəbbüslərin qarşısının alınmasının vacibliyini qeyd ediblər.
Görüş zamanı Azərbaycan, Ermənistan, Gürcüstan, Rusiya, İran və Türkiyənin iştirakı ilə fəaliyyət göstərən “3+3” Regional Əməkdaşlıq Platformasının işinin davam etdirilməsinə də diqqət ayrılıb.
Tərəflər regional məsuliyyət prinsipi əsasında platformanın fəaliyyətinin davam etdirilməsini sabitlik və təhlükəsizliyin möhkəmləndirilməsi baxımından əhəmiyyətli mexanizmlərdən biri kimi qiymətləndiriblər.