Azərbaycan son illər iqtisadiyyatın şaxələndirilməsi və investisiya imkanlarının genişləndirilməsi istiqamətində mühüm addımlar atır. Əczaçılıq, tekstil, ağır və yüngül sənaye, maşınqayırma kimi prioritet sahələr üzrə ixtisaslaşmış sənaye zonaları yaradılıb. Bununla yanaşı, beynəlxalq logistikanın inkişafı və xarici investorların cəlb edilməsi məqsədilə Ələt Azad İqtisadi Zonasının imkanları genişləndirilir.
İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev İslam İnkişaf Bankı Qrupunun 51-ci İllik Toplantıları çərçivəsində keçirilən “İslam İnkişaf Bankı Qrupunun Özəl Sektor Forumu”nda Azərbaycanın investisiya imkanları, iqtisadi inkişaf strategiyası və regional əməkdaşlıq perspektivləri barədə çıxış edib.Yusif Abdullayev bildirib ki, Azərbaycan əlverişli coğrafi mövqeyi, inkişaf edən nəqliyyat infrastrukturu və həyata keçirilən iqtisadi islahatlarla beynəlxalq investorlar üçün cəlbedici məkanlardan birinə çevrilir. Onun sözlərinə görə, Bakı Beynəlxalq Dəniz Ticarət Limanı artıq Xəzər regionunun mühüm logistika mərkəzlərindən biri kimi fəaliyyət göstərir.AZPROMO rəhbəri qeyd edib ki, Bakı–Tbilisi–Qars dəmir yolu Asiya ilə Avropa arasında birbaşa dəmir yolu bağlantısı yaradaraq yükdaşımaların daha sürətli və səmərəli həyata keçirilməsinə imkan verir. O, həmçinin Azərbaycanın günəş və külək enerjisi sahəsində böyük potensiala malik olduğunu vurğulayaraq, beynəlxalq tərəfdaşlarla birlikdə yaşıl enerji layihələrinin həyata keçirildiyini bildirib.Çıxış zamanı rəqəmsal iqtisadiyyatın inkişafına da diqqət çəkilib. Bildirilib ki, Azərbaycan innovasiya ekosistemlərinə, rəqəmsal infrastruktura və insan kapitalına investisiyalar yatırmaqla bilik əsaslı iqtisadiyyatın formalaşdırılmasını hədəfləyir.Yusif Abdullayev vurğulayıb ki, investorların əsas gözləntiləri etibarlı biznes mühiti, proqnozlaşdırıla bilən qaydalar və risklərə qarşı effektiv müdafiə mexanizmləridir. Bu istiqamətdə gömrük sistemlərinin yenilənməsi, rəqəmsal ticarət platformalarının inkişafı, sərhəd prosedurlarının sadələşdirilməsi və dövlət-özəl tərəfdaşlığı mexanizmlərinin yaradılması mühüm addımlar kimi qiymətləndirilir.AZPROMO rəhbəri əlavə edib ki, xarici investisiyaların artırılması üçün risklərin azaldılması mexanizmləri xüsusi əhəmiyyət daşıyır. Siyasi risk sığortası, ixrac kreditlərinin qorunması və maliyyə təminatı alətləri beynəlxalq layihələr üçün daha təhlükəsiz mühit yaradır və yeni investisiya imkanlarının reallaşmasına şərait yaradır.
