İstanbul klubu portuqaliyalı ulduzun transferi üçün 43 milyon avroya qədər ödəyə bilər
Elpress.az xəbər verir ki, Türkiyənin “Qalatasaray” klubu “Milan”ın portuqaliyalı hücumçusu Rafael Leaonun transferi ilə bağlı İtaliya təmsilçisi ilə rəsmi danışıqlara start verib.Məlumata görə, İstanbul klubu 27 yaşlı futbolçunun keçidini rəsmiləşdirmək üçün “Milan”la görüşlərə başlayıb. Leao transfer prosedurlarını tamamlamaq, tibbi müayinədən keçmək və müqaviləyə imza atmaq üçün bu gün İstanbula yollanacaq.Razılaşmaya əsasən, “Qalatasaray” portuqaliyalı futbolçunun transferinə görə “Milan”a 38 milyon avro ödəyəcək. Müqavilədə əlavə olaraq 5 milyon avro məbləğində bonusların da nəzərdə tutulduğu bildirilir.Leaonun Türkiyə klubunda illik 9-10 milyon avro qazanacağı gözlənilir. Bonusların aktivləşməsi halında futbolçunun mövsümlük gəliri 12 milyon avroya qədər yüksələ bilər. Bonus şərtləri arasında “Qızıl top” mükafatına namizədlik və Super Liqada bombardir olmaq kimi göstəricilər yer alır.Rafael Leao 2019-cu ildən “Milan”ın formasını geyinir. Portuqaliya millisinin də üzvü olan futbolçunun İtaliya klubu ilə müqaviləsi 2028-ci ilin yayına qədər qüvvədədir.
