İngiltərə Premyer Liqasında 2025/2026-cı illər mövsümünün çempionunun adına aydınlıq gəlib. Mövsüm ərzində sabit və inamlı çıxışı ilə diqqət çəkən Arsenal 22 ildən sonra yenidən ölkə çempionu olmağı bacarıb. London təmsilçisi XXXVII turun nəticələrindən sonra qızıl medalları vaxtından əvvəl təmin edib.
Elpress.az xəbər verirki, çempionluğun rəsmiləşməsinə əsas səbəb isə ən yaxın izləyici olan Manchester City klubunun səfərdə AFC Bournemouth ilə 1:1 hesablı heç-heçə etməsi olub. Bu xal itkisi nəticəsində “şəhərlilər” sona cəmi bir tur qalmış liderdən 4 xal geri düşərək çempionluq şansını tamamilə itiriblər.
Beləliklə, Mikel Artetanın rəhbərlik etdiyi “Arsenal” uzun illərdən sonra yenidən İngiltərə futbolunun zirvəsinə yüksəlib. Komanda mövsüm boyu nümayiş etdirdiyi hücum futbolu, möhkəm müdafiə xətti və stabil nəticələri ilə azarkeşlərinin böyük rəğbətini qazanıb.
Qeyd edək ki, London klubu sonuncu dəfə 2003/2004 mövsümündə Premyer Liqanın qalibi olmuşdu. Həmin mövsüm “Arsenal” məğlubiyyətsiz çempion olaraq futbol tarixinə düşmüş və “Yenilməzlər” ləqəbini qazanmışdı. Bu dəfəki çempionluq da klub tarixinin ən yadda qalan uğurlarından biri kimi qiymətləndirilir.
