Qeysəriyyə əməliyyatından sonra səhhəti ağırlaşan 28 yaşlı qadının həyatını xilas etmək mümkün olmayıb
Elpress.az xəbər verir ki, “Baku Medical Plaza”da qeysəriyyə əməliyyatından sonra komaya düşən 28 yaşlı Şəhla Muxtar qızı Quliyeva vəfat edib.Məlumata görə, qadının əməliyyatdan sonra beyninə qan sızıb və o, 20 gün komada qalıb. Həkimlərin səylərinə baxmayaraq, Şəhlanın həyatını xilas etmək mümkün olmayıb. Onun yeni doğulan övladının vəziyyətinin stabil olduğu bildirilib.Şəhla Quliyevanın yaxınları əməliyyatdan sonra səhhətinin kəskin pisləşməsi ilə bağlı mətbuata müraciət edərək klinikanın ginekoloqu Təravət Hümbətovanı günahlandırıblar. Yaxınlarının iddiasına əsasən, əməliyyatdan təxminən 20 saat sonra qadının arterial təzyiqi 200-dən yuxarı qalxıb və beyninə güclü qanaxma baş verib. Qanaxmanın beyin kötüyünə ciddi zərər vurduğu və ona beyin ölümü diaqnozu qoyulduğu bildirilib.“Baku Medical Plaza” isə ittihamlarla bağlı açıqlamasında qeyd edib ki, Şəhla Quliyeva hamiləliyinin 22-ci həftəsində tibb müəssisəsinə müraciət edib və müayinələrdən sonra hamiləliyi tibbi nəzarətə götürülüb. Klinikanın məlumatına görə, iyulun 28-də tibbi göstərişlər və mövcud klinik protokollar əsasında qeysəriyyə əməliyyatı həyata keçirilib.Klinikanın açıqlamasında əməliyyatdan sonra pasiyentdə qəfil başlayan şiddətli baş ağrısı və qıcolma müşahidə olunduğu, aparılan müayinələr nəticəsində isə III dərəcəli mitral qapaq çatışmazlığının müəyyən edildiyi bildirilib. Bunun ardınca həkim konsiliumu keçirilib və pasiyentin həmin klinik vəziyyətdə cərrahi müdaxiləyə uyğun olmadığı qənaətinə gəlinib.Qeyd edək ki, Şəhla Quliyeva “Azərbaycan Supermarket” MMC-də təchizat üzrə mütəxəssis kimi çalışıb.
