Fövqəladə Hallar Nazirliyi tərəfindən silsilə maarifləndirmə tədbirlərinin təşkili həyata keçirilib.
Aidiyyəti qurumların iştirakı ilə fövqəladə hallarla bağlı davranış qaydaları haqqında əhalinin maarifləndirilməsi məqsədilə silsilə tədbirlər təşkil olunub.Belə ki, FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin də qatıldığı tədbirlər Sumqayıt Regional Mərkəzi tərəfindən “Regnum Hotel”də, Abşeron rayonunun Qobu qəsəbəsində yerləşən 11 saylı körpələr evi-uşaq bağçasında, Abşeron Rayon İxtisaslaşdırılmış Olimpiya Ehtiyatları Uşaq-Gənclər İdman-Şahmat məktəbində və Novxanı kənd 13 saylı uşaq bağçasında, Gəncə Regional Mərkəzi tərəfindən Azərbaycan Respublikasının Qida Təhlükəsizliyi Agentliyinin Gəncə-Daşkəsən bölməsində, Cənub Regional Mərkəzi tərəfindən Lerik rayonunun N.Muradov adına Günəşli kənd tam orta məktəbində, Şimal Regional Mərkəzi tərəfindən “Siyəzən Rayon Mərkəzi Xəstəxanası” publik hüquqi şəxsində və Quba rayonunun Afurca kənd tam orta məktəbində, Qarabağ Regional Mərkəzi tərəfindən Ağcabədi şəhər 8 nömrəli körpələr evi-uşaq bağçasında, Şimal-qərb Regional Mərkəzi tərəfindən Şamaxı rayon Heydər Əliyev Mərkəzində, Aran Regional Mərkəzi tərəfindən isə Goranboy şəhər 1 nömrəli körpələr evi-uşaq bağçasında maarifləndirici görüşlər keçirilib.Tədbirlərin əsas məqsədi mümkün təbii və texnogen xarakterli fövqəladə hadisələr zamanı düzgün davranış qaydaları barədə əhali arasında maarifləndirməni gücləndirmək, bu istiqamətdə bilik və bacarıqları artırmaq olub.Görüşlərdə fövqəladə halların təsnifatı, ölkə ərazisində daha çox rast gəlinən təbii və texnogen risklər, xüsusilə yanğın və zəlzələ zamanı davranış qaydaları barədə ətraflı məlumat verilib, həmçinin FHN-in “112” qaynar xəttinin təyinatı izah olunub və ilkin yanğınsöndürmə vasitələrindən istifadə qaydaları praktik şəkildə nümayiş etdirilib.İnteraktiv formatda keçən tədbirlər zamanı iştirakçıların sualları cavablandırılıb və mövzu üzrə geniş izahlar verilib.
