Fövqəladə Hallar Nazirliyinin regional mərkəzlərində 28 May – Müstəqillik Günü münasibətilə silsilə tədbirlər təşkil olunub.
Elpress.az-ın məlumatına əsasən Tədbirlər çərçivəsində əvvəlcə Ümummilli Lider Heydər Əliyevin abidəsi ziyarət edilib, önünə gül dəstələri düzülərək xatirəsi ehtiramla anılıb.Dövlət Himninin səsləndirilməsi ilə başlayan mərasimlərdə Ulu Öndərin, həmçinin Azərbaycanın müstəqilliyi və ərazi bütövlüyü uğrunda həyatını itirən şəhidlərin xatirəsi bir dəqiqəlik sükutla yad olunub.Çıxışlarda bildirilib ki, Azərbaycan Xalq Cümhuriyyətinin yaradılması milli dövlətçilik tariximizin mühüm mərhələsi olmaqla yanaşı, Şərqdə ilk parlamentli respublikanın əsasını qoyub. Qeyd edilib ki, cəmi 23 ay fəaliyyət göstərməsinə baxmayaraq, AXC milli ordu quruculuğu, dövlət atributlarının yaradılması, təhsil sisteminin formalaşdırılması və qadınlara seçki hüququnun verilməsi kimi mühüm addımlarla tarixə düşüb.Natiqlər vurğulayıblar ki, müstəqilliyin yenidən bərpasından sonra Ulu Öndər Heydər Əliyevin rəhbərliyi ilə Azərbaycanın dövlətçiliyi möhkəmləndirilib, hüquqi-demokratik dövlət quruculuğu istiqamətində mühüm nailiyyətlər əldə olunub.Bildirilib ki, Prezident İlham Əliyevin rəhbərliyi ilə Azərbaycan daha da güclənərək beynəlxalq arenada nüfuzunu artırıb. Müzəffər Ali Baş Komandanın rəhbərliyi altında Ordumuz torpaqlarımızı işğaldan azad edib və ölkənin suverenliyi tam təmin olunub.Sonda tədbir iştirakçılarına 28 May – Müstəqillik Gününə həsr olunmuş sənədli film nümayiş etdirilib.
