MEDİA xəbər və statistik məlumatların yayımında mənbə, metodologiya və kontekstin düzgün göstərilməsinin vacibliyini vurğulayıb.
Medianın İnkişafı Agentliyi (MEDİA) mediada statistik məlumatların təqdimatı zamanı məlumatların mənbəyinin, hazırlanma metodologiyasının və ümumi kontekstinin düzgün izah edilməsinin vacibliyini açıqlayıb.Agentliyin rəsmi saytında yayımlanan məlumatda bildirilib ki, bəzi media subyektləri Dövlət İmtahan Mərkəzinin “Abituriyent” jurnalının 12-ci nömrəsində dərc olunan 2025/2026-cı tədris ili üzrə tələbə qəbulu və ümumi təhsil müəssisələrinin buraxılış imtahanlarının nəticələri ilə bağlı elmi-statistik göstəriciləri təhrif olunmuş formada təqdim edib.Qeyd olunub ki, bəzi saytlarda “Azərbaycanda 200 tələbə vəfat etdi” kimi reallığı düzgün əks etdirməyən və cəmiyyətdə yanlış təsəvvür yarada biləcək şişirdilmiş başlıqlardan istifadə edilməsi qəbuledilməzdir.MEDİA media qurumlarını “Media haqqında” Azərbaycan Respublikası Qanununun tələblərinə və peşəkar jurnalistika prinsiplərinə əməl etməyə çağırıb. Agentlik xüsusilə vurğulayıb ki, statistik məlumatların yayımlanması zamanı yalnız rəqəmləri təqdim etmək deyil, onların mənbəyini, necə əldə olunduğunu və hansı şəraitdə qiymətləndirilməli olduğunu da düzgün izah etmək vacibdir.Açıqlamada ictimai əhəmiyyət daşıyan mövzuların işıqlandırılmasında məsuliyyətli və obyektiv yanaşmanın medianın əsas vəzifələrindən biri olduğu bildirilib.
