Regionlarda həkim çatışmazlığının aradan qaldırılması məqsədilə 65 yaş həddinə çatmış həkimlərin fəaliyyətinə davam etməsinə icazə verilməsi nəzərdə tutulur.
Milli Məclisin Səhiyyə komitəsinin bu gün keçirilən iclasında ölkədə, xüsusilə regionlarda mövcud olan həkim çatışmazlığı məsələsi geniş müzakirə olunub. Komitə sədri Əhliman Əmiraslanov bildirib ki, bu problem uzun müddətdir aktualdır və onun həlli istiqamətində müxtəlif görüşlər, dinləmələr və aidiyyəti qurumlarla müzakirələr aparılır.Müzakirələr zamanı qeyd edilib ki, Tibb Universitetini bitirən, lakin rezidentura təhsili almamış gənc həkimlərin Təkmilləşdirmə İnstitutu vasitəsilə regionlara yönləndirilməsi planlaşdırılır. Bununla yanaşı, 65 yaş həddinə çatmış təcrübəli həkimlərin də təqaüdə göndərilməsi məsələsinə yenidən baxılması gündəmdədir.Yeni yanaşmaya əsasən, həmin həkimlərin fəaliyyətini davam etdirməsinə şərait yaradılması və onların regionlarda səhiyyə xidmətlərinin gücləndirilməsində iştirak etməsi nəzərdə tutulur. Əhliman Əmiraslanov bu addımların səhiyyə sistemində mövcud boşluqların aradan qaldırılmasına və xidmət keyfiyyətinin yüksəldilməsinə töhfə verəcəyini bildirib.
