Türkiyə və Yaponiya arasında müdafiə sənayesi sahəsində əməkdaşlığın dərinləşdirilməsi planlaşdırılır.
Elpress.az-ın Apa.az-a istinadən verdiyi məlumata əsasən, Türkiyənin xarici işlər naziri Hakan Fidan Yaponiyanın “Nikkei Asia” nəşrinə müsahibəsində bildirib ki, Ankara Yaponiya ilə müdafiə sənayesi sahəsində əməkdaşlığı daha da genişləndirməyi hədəfləyir.Nazir vurğulayıb ki, Türkiyə pilotsuz uçuş aparatlarının istehsalında qabaqcıl ölkələrdən biri hesab olunur və bu sahədə Tokio ilə əlaqələrin inkişafına xüsusi önəm verir.Fidanın sözlərinə görə, Türkiyə və Yaponiya bir-birini tamamlayan imkanlara malikdir və hər iki tərəf üçün faydalı olacaq əməkdaşlıq potensialı kifayət qədər yüksəkdir.O qeyd edib ki, Türkiyənin PUA və dron texnologiyaları müxtəlif əməliyyat şəraitlərində sınaqdan uğurla çıxıb. Bu texnologiyalar xüsusilə sahil və sərhəd təhlükəsizliyi istiqamətində Yaponiya ilə birgə layihələrin və ortaq istehsalın həyata keçirilməsi üçün geniş imkanlar yaradır.Nazir həmçinin Türkiyə ilə Yaponiya arasında sosial təminat sazişi üzrə aparılan danışıqlarda müsbət irəliləyişlərin əldə olunduğunu açıqlayıb. Onun sözlərinə görə, son görüşlər uğurlu keçib və tərəflər yaxın zamanda yekun razılığa gələcəklərinə ümid edirlər.
