Türkiyədə “Terrorsuz Türkiyə” prosesi çərçivəsində hazırlanmış 12 maddəlik qanun layihəsi Türkiyə Böyük Millət Məclisinin müzakirəsinə təqdim edilib.
Elpress.az xəbər verir ki, “Milli Həmrəylik və İctimai İnteqrasiyanın Gücləndirilməsi” adlı çərçivə sənədi terrorla mübarizə və ictimai həmrəyliyin möhkəmləndirilməsi istiqamətində yeni hüquqi mexanizmlərin yaradılmasını nəzərdə tutur.
Məlumata görə, layihə AK Partiya tərəfindən hazırlanıb. Sənədə MHP sədri Dövlət Baxçalı və TBMM sədri Numan Kurtulmuş da imza ataraq dəstəklərini ifadə ediblər. Qanun layihəsinin AK Partiya, MHP və DEM Partiyasının birgə imzası ilə parlamentə təqdim olunduğu və yaxın günlərdə səsverməyə çıxarılacağı gözlənilir.
Bildirilib ki, layihə ümumi əfv xarakteri daşımır və terror təşkilatlarının rəhbərlərinə xüsusi hüquqi status nəzərdə tutmur. Sənədə əsasən, qanunda nəzərdə tutulan güzəştlərdən yararlanmaq istəyən şəxslər müəyyən edilmiş müddət ərzində rəsmi qaydada müraciət etməlidirlər.
