İran Xarici İşlər Nazirliyi Ukraynanın Tehrandakı müvəqqəti işlər vəkilini nazirliyə dəvət edərək Xəzər dənizində baş verdiyi iddia olunan insidentlə bağlı rəsmi etirazını çatdırıb.
Elpress.az xəbər verir ki, İran tərəfinin yaydığı məlumata əsasən, hadisə Ukrayna ordusunun Xəzər dənizində İran bayrağı altında üzən ticarət gəmisinə hücum etdiyi iddiası ilə əlaqədardır.
Bildirilir ki, insident nəticəsində bir dənizçi həlak olub, bir neçə nəfər isə müxtəlif dərəcəli xəsarətlər alıb.Məlumata görə, Ukraynanın müvəqqəti işlər vəkilini İran xarici işlər nazirinin köməkçisi və Avrasiya üzrə baş direktoru Menuçehr Moradi qəbul edib. Görüş zamanı Tehran hadisə ilə bağlı kəskin narazılığını qarşı tərəfin diqqətinə çatdırıb.İran XİN bəyan edib ki, Xəzər dənizində ticarət gəmisinə hücum beynəlxalq hüququn, o cümlədən BMT Nizamnaməsinin prinsiplərinə ziddir və regionun təhlükəsizliyi üçün ciddi risk yaradır.Rəsmi Tehran baş verən hadisəyə görə Ukraynanın məsuliyyət daşıdığını bildirərək, insidentdə iştirak edən şəxslərin müəyyən edilərək məsuliyyətə cəlb olunmasını tələb edib.
Qeyd edək ki, Ukrayna tərəfi məsələ ilə bağlı hələlik rəsmi açıqlama verməyib.
