Maduro həbsdən sonra çəkilən ilk fotosunun necə əldə edildiyini oğlu açıqladı

Elpress.az xəbər verir ki, ABŞ-nin Venesuelaya hərbi müdaxiləsi zamanı saxlanılan ölkənin keçmiş prezidenti Nikolas Maduronun həbsdən sonra çəkilmiş ilk fotosunun ailəsinə necə çatdırıldığı məlum olub.
Məlumatı Maduronun oğlu Nikolas Maduro Querra “X” hesabında paylaşdığı açıqlamada verib. “Nikolassito” ləqəbi ilə tanınan Maduro Querra bildirib ki, sözügedən foto iyunun 25-də, Venesuelada baş verən iki güclü zəlzələdən bir gün sonra çəkilib.
Onun sözlərinə görə, həmin vaxt Maduro televiziyadan zəlzələnin yaratdığı fəsadları izləyib və hadisədən ciddi şəkildə narahat olub. Keçmiş prezident həmin gün ailəsi ilə telefon vasitəsilə bir neçə dəfə əlaqə saxlayaraq La Quaira və digər bölgələrdəki vəziyyətlə maraqlanıb.
Nikolasito qeyd edib ki, foto çəkilən zaman atası şəkil çəkdirmək üçün münasib əhvalda olmayıb. Lakin fotoqrafın təkidindən sonra Maduro görüntünün gələcəkdə onun vəziyyətinin yaxşı, həmçinin güclü və dözümlü olduğunu göstərməsinə xidmət edə biləcəyini düşünərək foto çəkdirməyə razılıq verib.
Maduro Querra bildirib ki, fotoqrafa görüntünün iki çap olunmuş nüsxəsi təqdim edilib. Həmin nüsxələr iyulun 13-də poçt vasitəsilə göndərilib və avqustun 25-də ABŞ-də yaşayan ailə üzvlərinə çatıb.
Ailənin fotonun ictimaiyyətə necə təqdim olunacağını müzakirə etdiyini deyən Nikolasito sonradan atasından foto ilə birlikdə yayımlanması üçün mesaj hazırlamasını istəyiblər. Onun sözlərinə görə, Maduro avqustun 28-də telefon danışığı zamanı həmin mesajı diktə edib və foto avqustun 30-da ictimaiyyətə təqdim olunub.
Maduro Querra həm atasının, həm də anası Siliya Floresin azadlığa buraxılması üçün mübarizəni davam etdirəcəklərini bildirib.