Böyük Britaniya Parlamenti nəzdində dövlət xərclərinə nəzarət edən parlament komitəsi hökumətin müdafiə xərcləri üzrə planlaşdırma və qərarlarının gecikdirilməsinin ölkənin beynəlxalq tərəfdaşlar qarşısında etibarlılığına və strateji mövqeyinə mənfi təsir göstərdiyini vurğulayıb.
Böyük Britaniya Parlamenti nəzdində fəaliyyət göstərən İctimai Hesablar Komitəsinin hesabatında bildirilir ki, Müdafiə İnvestisiya Planının ötən ilin payızında açıqlanması nəzərdə tutulsa da, sənədin yalnız NATO-nun gələn ay keçiriləcək sammiti ərəfəsində təqdim ediləcəyi gözlənilir. Komitə hesab edir ki, planın gecikdirilməsi ən müasir hərbi texnika və müdafiə avadanlıqlarının satın alınmasını daha baha başa gətirərək dövlət xərclərinə əlavə yük yaradır və bu vəziyyət ölkənin Silahlı Qüvvələrinin modernləşdirilməsi prosesini zəiflədir.Sənəddə qeyd olunur ki, Müdafiə İnvestisiya Planı növbəti on il ərzində yeni hərbi texnika, silah sistemləri və müdafiə infrastrukturunun maliyyələşdirilməsi üçün əsas çərçivəni müəyyənləşdirəcək. Eyni zamanda, Böyük Britaniya Müdafiə Nazirliyi nümayəndələri bildirirlər ki, bu plan əvvəlki hökumətdən miras qalmış köhnəlmiş, həddindən artıq öhdəliklərlə yüklənmiş və kifayət qədər maliyyələşdirilməmiş müdafiə proqramlarında mövcud problemlərin aradan qaldırılmasına və sistemin daha səmərəli şəkildə yenidən qurulmasına xidmət edəcək.
