Elpress.az xəbər verir ki, rezidenturaya qəbul imtahanının II mərhələsində iştirak etmək istəyən namizədlər üçün qeydiyyat prosesi iyulun 22-dən başlayır.
Dövlət İmtahan Mərkəzinin (DİM) məlumatına əsasən, baza fənləri üzrə keçirilən I mərhələ imtahanında 40 və daha çox bal toplayaraq “məqbul” nəticə əldə edən namizədlər iyulun 30-u saat 23:59-dək “Şəxsi kabinet”lərinə tələb olunan məbləği əlavə etməklə qeydiyyatdan keçməlidirlər.
Qeyd olunub ki, qeydiyyatdan keçməyən namizədlər ixtisas fənləri üzrə biliklərin qiymətləndirilməsi imtahanına buraxılmayacaqlar.Bildirilib ki, I mərhələdə uğur qazanan tələbələr isə yalnız əsas (baza ali) tibb təhsilini tam başa vurduqdan və rezidenturaya qəbul hüququ əldə etdikdən sonra II mərhələ imtahanında iştirak edə biləcəklər.
DİM-in açıqlamasına görə, rezidenturaya qəbul imtahanının II mərhələsinin avqustun 9-da Bakı və Naxçıvan şəhərlərində elektron formatda keçirilməsi planlaşdırılır.
