Qırğızıstanda İssık-Kul gölünün akvatoriyasında keçiriləcək UIM F1H2O (suda Formula 1) dünya çempionatının ətraf mühitə təsirləri üzrə aparılan əlavə ekoloji qiymətləndirmələr yarışın təhlükəsiz şəkildə təşkil edilə biləcəyini göstərib.
Dövlət Turizm İnkişaf Agentliyinin rəhbəri Eduard Kubatovun açıqlamasına görə, beynəlxalq idman tədbirləri üçün ətraf mühitə təsirin qiymətləndirilməsi hər zaman məcburi tələb olmasa da, ictimai narahatlıqlar nəzərə alınaraq müstəqil və dövlət qurumlarının iştirakı ilə geniş ekoloji ekspertiza aparılıb.Rəsmi məlumatda bildirilir ki, araşdırmaların nəticəsi İssık-Kul gölünün ekosisteminin ciddi risk altında olmadığını, yarışların təbiətə əhəmiyyətli mənfi təsir göstərməyəcəyini ortaya qoyub. Kubatov vurğulayıb ki, bu addım əsasən ictimai etimadı gücləndirmək və ekoloji şəffaflığı təmin etmək məqsədi daşıyır.Qeyd edək ki, suda Formula 1 üzrə dünya çempionatı iyulun 31-dən avqustun 2-dək İssık-Kul rayonunun Bayetov kəndi yaxınlığında keçiriləcək. Yarışlara 25 idmançının qatılması gözlənilir və tədbirin 100 ölkədə canlı yayımlanması planlaşdırılır. Bu isə Qırğızıstanın və İssık-Kul bölgəsinin turizm imkanlarının beynəlxalq auditoriyaya çıxarılması baxımından mühüm platforma kimi dəyərləndirilir.
