Elpress.az xəbər verir ki, Türkiyənin İstanbul şəhərinin Ümraniye rayonunda borc məsələsi səbəbindən baş verən silahlı insident ölümlə nəticələnib.
Məlumata görə, 17 yaşlı Arda Berk Aktaş və dörd dostu qarşı tərəflə görüşmək üçün avtomobillə hadisə yerinə gəlib. Küçədə qarşılaşan tərəflər arasında əvvəlcə mübahisə yaranıb, daha sonra qarşıdurma silahlı atışmaya çevrilib.
Atəş nəticəsində Arda Berk Aktaş ağır yaralanıb. Bundan başqa, onun yanında olan bir nəfər və qarşı tərəfdən daha bir şəxs də güllə yarası alıb.
Xəstəxanaya çatdırılan yeniyetmənin həyatını xilas etmək mümkün olmayıb.
Hadisə ilə bağlı araşdırma aparan polis təhlükəsizlik kameralarının görüntülərini incələyərək insidentdə iştirak edən 13 şübhəlini müəyyən edib. Onlardan 12-si məhkəmənin qərarı ilə həbs edilib, bir nəfər isə sərbəst buraxılıb.
İstintaq zamanı şübhəlilərin hadisədən sonra təhlükəsizlik kameralarının qeydlərini silməyə cəhd göstərdikləri müəyyənləşib. Keçirilən əməliyyatlar zamanı onların gizləndiyi ünvanlardan 3 ədəd odlu silah götürülüb.
Faktla bağlı araşdırmalar davam edir.
