26 İyun – Silahlı Qüvvələr Günü münasibətilə Müdafiə Nazirliyində yeni istifadəyə verilən bir sıra obyektlərin açılışı olub.
Elpress.az xəbər verir ki, Müdafiə Nazirliyinin rəhbər heyəti yeni inşa edilən idman zalı və Baş Klinik Hospitalın Təcili tibbi yardım bölməsində yaradılan şəraitlə tanış olub.
Müdafiə naziri general-polkovnik Zakir Həsənova bildirilib ki, müasir standartlara uyğun qurulan idman zalı hərbi qulluqçuların fiziki hazırlığının və dözümlülüyünün artırılması üçün zəruri avadanlıqlarla təchiz edilib.
Daha sonra Baş Klinik Hospitalın Təcili tibbi yardım bölməsində yeni təcili yardım avtomobilləri və müasir tibbi avadanlıqlar təqdim olunub. Qeyd edilib ki, bu nəqliyyat vasitələri təxliyə olunan hərbi qulluqçulara operativ və keyfiyyətli ilkin tibbi yardım göstərilməsi üçün ən son texnologiyalarla təmin edilib.
Bildirilib ki, həyata keçirilən bu layihələr Azərbaycan Prezidenti, Silahlı Qüvvələrin Ali Baş Komandanı İlham Əliyevin diqqət və qayğısı nəticəsində hərbi qulluqçuların xidmət və sosial-məişət şəraitinin yaxşılaşdırılması istiqamətində görülən işlərin davamıdır.
