Dövlət Dəniz və Liman Agentliyi dənizçiləri yüksək riskli bölgələrə səfərlərdən çəkinməyə çağırıb
Elpress.az xəbər verir ki , Dövlət Dəniz və Liman Agentliyi son aylarda xarici sularda müxtəlif dövlətlərin bayraqları altında üzən gəmilərdə çalışan azərbaycanlı dənizçilərin həlak olması ilə bağlı yayılan xəbərlərin dərin təəssüf doğurduğunu bildirib.Qurum həlak olan dənizçilərə Allahdan rəhmət, onların ailə üzvləri və yaxınlarına səbir diləyərək, hazırda təhlükəsizlik riskinin yüksək olduğu bölgələrlə bağlı mühüm xəbərdarlıq edib.Agentlik xüsusilə Qara və Azov dənizləri hövzəsində, eləcə də Hörmüz boğazı və Fars körfəzi istiqamətlərində təhlükəsizlik risklərinin yüksək olduğunu vurğulayaraq, azərbaycanlı dənizçiləri həyat və sağlamlıqlarını hər şeydən üstün tutmağa çağırıb.Bildirilib ki, müharibə zonalarına və ya aktiv hərbi əməliyyatların aparıldığı ərazilərə səfərə razılıq verməzdən əvvəl mövcud təhlükələr diqqətlə qiymətləndirilməli, rəsmi qurumların xəbərdarlıqları nəzərə alınmalı və imkan daxilində belə marşrutlardan istifadə edilməməlidir.Agentlik eyni zamanda gəmiçilik şirkətlərini və aidiyyəti qurumları dənizçilərin təhlükəsizliyini prioritet hesab etməyə, riskli bölgələrə səfərlər zamanı bütün zəruri təhlükəsizlik tədbirlərini görməyə və mümkün olduqda həmin marşrutlardan imtina etməyə çağırıb.
