İspaniyanın keçmiş baş naziri Mariano Rahoyun Fransa milli futbol komandası barədə səsləndirdiyi fikirlər həm siyasi, həm də idman ictimaiyyətində geniş müzakirələrə səbəb olub.
Elpress.az xəbər verir ki, İspaniyanın keçmiş baş naziri Mariano Rahoy “El Debate” qəzetində dərc olunan məqaləsində Fransa millisinin heyəti ilə bağlı səsləndirdiyi fikirlərlə diqqət çəkib. O, Dünya Çempionatının yarımfinalında İspaniya ilə Fransa arasında keçiriləcək oyuna toxunaraq, Fransa komandasının güclü rəqib olduğunu bildirsə də, heyətdə “heç bir fransız oyunçunun olmadığını” iddia edib.Rahoy yazısında Fransa millisinin ikiqat dünya çempionu olduğunu və son dünya çempionatında finala yüksəldiyini xatırladaraq komandanın yüksək səviyyəli futbolçulardan ibarət olduğunu vurğulayıb. Bununla yanaşı, onun milli komandanın tərkibi ilə bağlı səsləndirdiyi fikirlər Fransada ciddi etirazlara səbəb olub.Fransa Sosialist Partiyasının birinci katibi Olivye For bildirib ki, Fransa millisinin bütün üzvləri Fransa vətəndaşlarıdır və onların milli kimliyini şübhə altına almaq qəbuledilməzdir. O, ölkənin etnik deyil, respublika dəyərləri üzərində qurulmuş siyasi millət olduğunu vurğulayıb və Rahoyun açıqlamalarını irqçi ritorika kimi qiymətləndirib.Fransanın ayrı-seçkiliklə mübarizə üzrə nümayəndə naziri Oror Berje də bu fikirləri sərt tənqid edərək bildirib ki, idmanda insanların yalnız istedadı ön planda olmalıdır. O, Fransa millisinin ölkənin ən yaxşı dəyərlərini təmsil etdiyini qeyd edib.Qeyd edək ki, 71 yaşlı Mariano Rahoy 2011–2018-ci illərdə İspaniyanın baş naziri vəzifəsini icra edib. Onun açıqlamaları Dünya Çempionatının İspaniya–Fransa yarımfinalına az qalmış Avropada milli kimlik və müxtəliflik mövzusu ətrafında yeni müzakirələrə yol açıb.
