ÜST Konqo Demokratik Respublikasında Ebola virusuna yoluxmuş 5 nəfərin sağalmasını mühüm irəliləyiş kimi dəyərləndirib.
Al Jazeera-nın məlumatına görə, ÜST rəhbəri Tedros Adanom Qebreyesus Konqonun şərqindəki Bunia şəhərinə səfəri zamanı nadir Bundibuqyo Ebola ştammına yoluxmuş 5 xəstənin sağalmasını epidemiyaya qarşı mübarizədə ümidverici və mühüm irəliləyiş kimi qiymətləndirib.Eyni zamanda Bunia şəhərində yeni Ebola müalicə mərkəzinin fəaliyyətə başlaması yoluxmaların daha tez aşkarlanması və effektiv müalicənin təmin edilməsi baxımından mühüm addım kimi qeyd olunur.Bununla belə, ÜST epidemiyanın hələ də ciddi təhlükə yaratdığını vurğulayır. Son məlumatlara görə, Konqo Demokratik Respublikası və qonşu Uqandada yüzlərlə şübhəli yoluxma halı qeydə alınıb, 220-dən çox insanın isə həyatını itirdiyi ehtimal edilir. Səhiyyə sisteminin zəifliyi, münaqişələr və təhlükəsizlik problemləri virusun yayılmasına qarşı mübarizəni çətinləşdirir.ÜST rəhbəri əlavə edib ki, xəstələrin sağalması sevindirici olsa da, epidemiyanın tam nəzarətə alınması üçün beynəlxalq əməkdaşlıq və operativ tədbirlərin davam etdirilməsi vacibdir.
