Elpress.az xəbər verir ki, Azərbaycan Texniki Universiteti (AzTU) və Alman Akademik Mübadilə Xidmətinin birgə təşkilatçılığı ilə universitetdə “Falling Walls Lab” beynəlxalq müsabiqəsi keçirilib.
Tədbirin açılışında çıxış edən AzTU-nun rektoru Vilayət Vəliyev bildirib ki, belə beynəlxalq layihələr gənc alim və tədqiqatçıların innovativ ideyalarının dünya səviyyəsində tanıdılması baxımından mühüm əhəmiyyət daşıyır. Müsabiqəyə bu il 150-yə yaxın müraciət daxil olub. Seçim mərhələsini uğurla keçən iştirakçılar müxtəlif ali təhsil müəssisələrini və elmi-tədqiqat qurumlarını təmsil edən 18 layihə ilə final mərhələsində çıxış edərək ideyalarını üç dəqiqə ərzində təqdim ediblər. Layihələr innovativlik, praktik əhəmiyyət, təqdimat bacarığı və auditoriyaya təsir kimi meyarlar əsasında qiymətləndirilib.Yekunda Bakı Ali Neft Məktəbinin tədqiqatçısı Aytac Süleymanzadə “Breaking Walls of Volatile Batteries” (“Dəyişkən batareyalar üçün həll”) layihəsi ilə müsabiqənin Azərbaycan üzrə qalibi elan olunub.Yeni nəsil elektrolitlərin hazırlanmasını nəzərdə tutan layihə batareyaların təhlükəsizliyinin, istismar müddətinin və səmərəliliyinin artırılmasına yönəlib.
Aytac Süleymanzadə noyabr ayında Berlində keçiriləcək beynəlxalq final mərhələsində Azərbaycanı təmsil edəcək.
