Quş qripinin qarşısının alınması məqsədilə hazırlanmış Fəaliyyət Planına uyğun olaraq, 2025-ci ilin noyabr və dekabr aylarında, eləcə də cari ilin yanvar–may aylarında ölkə ərazisində, o cümlədən Naxçıvan Muxtar Respublikasında aparılan monitorinqlərin nəticələri ictimaiyyətə təqdim olunub.
AQTA-nın İnformasiya təminatı və innovativ həllər şöbəsinin verdiyi məlumata əsasən, monitorinqlər çərçivəsində ölkə üzrə riskli hesab edilən su-bataqlıq ərazilərində, dənizkənarı zonalarda, milli park və qoruqlarda, ovçuluq təsərrüfatlarında, həmçinin çay və su anbarlarının ətrafında geniş müşahidələr aparılıb. Bu müddətdə vəhşi quşlar klinik müayinədən keçirilib, müxtəlif növ quşlardan laborator analizlər üçün nümunələr götürülüb, eyni zamanda quşçuluq müəssisələrində, kəsim məntəqələrində və ailə təsərrüfatlarında saxlanılan ev quşlarından qan və yaxma nümunələri götürülərək laborator müayinələrə cəlb olunub.Bundan əlavə, təbiət ərazilərində, quşçuluq obyektlərində, bazarlarda, zooparklarda, parklarda və dekorativ quşların saxlandığı yerlərdə ümumi baxışlar keçirilib, baytarlıq qaydalarına riayət olunması ilə bağlı maarifləndirici tədbirlər həyata keçirilib.Laborator analizlərin və aparılan müşahidələrin nəticələrinə əsasən, ölkə ərazisində quş qripi xəstəliyinin törədicisi və ya ona şübhəli hər hansı hal aşkar edilməyib, həmçinin ev quşlarından götürülən nümunələr Nyukasl xəstəliyinə görə də yoxlanılıb və heç bir yoluxma və ya şübhəli vəziyyət müəyyən olunmayıb.
