Azərbaycan Dəmir Yolları (ADY) lokomotiv parkının yenilənməsi məqsədilə Çin Xalq Respublikasında yeni əməkdaşlıq addımları atıb.
ADY nümayəndə heyəti səfər çərçivəsində CRRC Ziyang Co., Ltd şirkətinin rəhbərliyi ilə görüş keçirib. Görüşdə həm yük, həm də sərnişin daşımaları üçün yeni lokomotivlərin alınması və texniki əməkdaşlığın genişləndirilməsi müzakirə olunub.Məlumata görə, ötən il imzalanan müqaviləyə əsasən 7 ədəd yeni yük lokomotivinin sentyabr ayında Azərbaycana gətirilməsi planlaşdırılır. Bundan əlavə, növbəti mərhələdə daha 14 lokomotivin alınması ilə bağlı danışıqlar aparılır.Eyni zamanda tərəflər arasında 4 ədəd müasir magistral sərnişin lokomotivinin alınmasına dair yeni müqavilə də imzalanıb. Bu lokomotivlərin 2027-ci ildə ölkəyə gətirilməsi nəzərdə tutulur.Yeni texnikanın Azərbaycanın Şərq–Qərb və Şimal–Cənub nəqliyyat dəhlizlərində yük və sərnişin daşımalarının daha sürətli, təhlükəsiz və səmərəli həyata keçirilməsinə imkan verəcəyi bildirilir.
