Milli Gimnastika Arenasında batut gimnastikası üzrə 10-cu, tamblinq üzrə isə 22-ci ölkə çempionatı uğurla yekunlaşıb.
Yarışda Bakı Gimnastika Məktəbi və “Ocaq Sport” Klubunu təmsil edən təxminən 50-yə yaxın idmançı müxtəlif yaş kateqoriyalarında – yeniyetmələr, gənclər və böyüklər arasında güclərini sınayıblar. İdmançılar batut gimnastikasında fərdi və sinxron, tamblinqdə isə fərdi proqramlar üzrə çıxış edərək öz texniki hazırlıqlarını, çevikliklərini, koordinasiya və ustalıqlarını nümayiş etdiriblər.Gərgin və rəqabətli keçən mübarizədə hər hərəkətin dəqiqliyi, yüksək performans və sabitlik ön plana çıxıb, idmançılar isə birincilik uğrunda sonadək mübarizə aparıblar.Yarışda batut gimnastikası üzrə dünya çempionatının sinxron proqramında bürünc medalçısı və “Paris-2024” Yay Olimpiya Oyunlarının iştirakçısı Selcan Mahsudova, həmçinin III MDB Oyunlarının qızıl medalçısı Maqsud Mahsudov da çıxış ediblər. Tamblinq üzrə isə ikiqat dünya çempionu, Dünya Oyunlarının gümüş mükafatçısı, Avropa çempionu Tofiq Əliyev, üçqat dünya çempionu Mixail Malkin və ikiqat dünya çempionu Adil Hacızadə kimi tanınmış idmançılar da yarışda öz bacarıqlarını göstəriblər.Nəticələrə əsasən, batut gimnastikası üzrə qadınların fərdi proqramında Selcan Mahsudova, kişilərin fərdi proqramında isə Maqsud Mahsudov qızıl medal qazanıblar. Tamblinq yarışlarında Tofiq Əliyev qızıl, Mixail Malkin gümüş, Adil Hacızadə isə bürünc medala sahib olublar.Çempionatın keçirilməsində əsas məqsəd gənc və perspektivli idmançıların üzə çıxarılması, onların yarış təcrübəsinin artırılması, milli komanda üçün ehtiyat qüvvənin formalaşdırılması və ölkədə batut gimnastikası ilə tamblinq növlərinin inkişafına dəstək verilməsi olub. Yekun nəticələrə əsasən, Bakı Gimnastika Məktəbinin yetirmələri müxtəlif yaş qruplarında yüksək nəticələr göstərərək mükafatçılar sırasında yer almağı bacarıblar.
